У нашым невялічкім гарадку няма буйных прадпрыемстваў і заводаў, але, як ужо неаднойчы адзначалася, галоўным багаццем хоцімскай зямлі заўжды былі людзі – працавітыя і шчырыя. Асабліва прыемна назіраць, калі праца хацімчан на роднай зямлі дае станоўчыя вынікі і атрымлівае дастойныя водгукі. На днях сваю заслужаную ўзнагароду за шматгадовую працу – нагрудны знак “Ветэран газавай і паліўнай прамысловасці” ад генеральнага дырэктара вытворчага рэспубліканскага ўнітарнага прадпрыемства “Магілёўаблгаз” Аляксея Кушнарэнка атрымаў Уладзімір Ермакоў, вадзіцель 1 класа Хоцімскага цэха звадкаванага газа Крычаўскага межраённага вытворчага ўпраўлення газавай гаспадаркі г. Хоцімск, які прысвяціў рабоце ў арганізацыі вялікі адрэзак свайго жыцця.

– Мне асабліва прыемна ўручаць падобныя ўзнагароды людзям, якія сваёй працай свядома, сумленна і самааддана з дня ў дзень працуюць на карысць не толькі арганізацыі, а ўсяго свайго края, умеюць вырашаць складаныя вытворчыя задачы. За гэта вам асобныя словы падзякі. Прыемна, што падобныя ўзнагароды паспелі ўжо набыць пастаянны характар,- адзначыў гендырэктар “Магілёўаблгаза”.
Безумоўна, для самаго Уладзіміра Паўлавіча дадзеная падзяка дарагога каштуе. А трэба сказаць, што пачынаў ён свой працоўны шлях у далёкім Казахстане, але душой увесь час імкнуўся на Хоцімшчыну. І гэта прыцягненне аказалася мацней, так ён апынуўся ў родных пенатах. Тут стварыў сям’ю, знайшоў сяброў і справу па душы.
Да Уладзіміра Паўлавіча ў калектыве ставяцца з павагай, да яго, як да вопытнага і адказнага працаўніка падыходзяць параіцца маладыя кадры. І ён заўжды гатовы дапамагчы, дзе трэба падтрымаць добрым словам.
Уладзімір Ермакоў упэўнены, што станоўчы вынік любой справы – працэс агульны, таму ўдзячны ўсяму свайму калектыву за падтрымку і аказаны давер.

Вольга Зайцава.
Фота Дзмітрыя ЛАМЕКІНА