Дар’я Самафалава, Забялышынская школа,
1 месца ў абласной алімпіядзе па беларускай мове

Дар’я штогод прымае ўдзел у раённых алімпіядах па вучэбных прадметах, не стаў выключэннем і гэты год. Па выніках яна стала абсалютным лідэрам і атрымала адразу тры Дыпломы 1 ступені: па рускай мове і літаратуры, беларускай мове і літаратуры, фізіцы. Абласная алімпіяда прынесла ў капілку забялышынскай зорачкі яшчэ адну перамогу – першае месца па беларускай мове.
– Прызнацца па праўдзе вельмі хвалявалася. Нават падчас канікул шмат часу праводзіла за падручнікамі: паўтарала правілы, рабіла разнастайныя заданні, асаблівы акцэнт быў зроблены на напісанне водгуку. Вынік прыемна здзівіў, нават і падумаць не магла, што атрымаю звыш 80%. Вельмі ўдзячна сваёй настаўніцы Жураўлёвай Наталлі Мікалаеўне за цудоўную падрыхтоўку і падтрымку. Хутка ўжо прыйдзе час вызначацца з будучай прафесіяй. Думаю, што гэта будзе лінгвістычны інстытут.

Антон Удавенка, Забялышынская школа,
2 месца ў абласной алімпіядзе па фізічнай культуры

Як расказаў настаўнік фізічнай культуры Забялышынскай школы Аляксандр Сцепчанка, яго вучань вельмі адказна і напружана рыхтаваўся да алімпіяды. Неабходна было прайсці 4 туры: тэорыя, плаванне, спартыўныя гульні. У кожным туры быў яшчэ шэраг заданняў, якія Антон вельмі добра выканаў і стаў адным з лепшых спартсменаў вобласці. Найбольш складаным турам для яго было плаванне, так як у сельскай школе няма магчымасці для заняткаў дадзеным відам спорта. Варта адзначыць, што адразу пасля абласной алімпіяды прайшлі раённыя спаборніцтвы «Абаронца Айчыны», дзе Антон таксама заняў лідыруючыя пазіцыі. Хочацца спадзявацца, што ўдзел у рэспубліканскім туры прынясе забялышынскаму спартсмену новыя ўзнагароды.
– Вельмі ўдзячны за добрую падрыхтоўку свайму настаўніку, за падтрымку – бацькам, сябрам. Спадзяюся, што апраўдаю іх надзеі і добра выступлю на рэспубліцы.

Елісей Хромчанка,
Забялышынская школа,
Пахвальны водгук па
геаграфіі

Елісей пачаў прымаць удзел у алімпіядах з 5 класа. Любімым прадметам спачатку быў «Чалавек і свет», пасля геаграфія. Настаўнік Тамара Свірэпа сцвярджае, што Елісей адрозніваецца самастойнасцю, уседлівасцю, блок пытанняў любой складанасці ён імкнецца зрабіць без старонняй дапамогі.
– Удзел у алімпіядзе пакінуў самыя станоўчыя эмоцыі. У першую чаргу вельмі ўдзячны Тамары Міхайлаўне Свірэпа, якая дапамагла належным чынам падрыхтавацца. Самым няпростым момантам былі практычныя заданні, але я вельмі стараўся сабрацца і ўспомніць усё, чаму мяне вучыла настаўніца. Вельмі прыемным быў момант уручэння Пахвальнага водгуку з рук дацэнта кафедры прыродазнаўства Уладзіміра Хамякова, з якім пасля была магчымасць зрабіць фотаздымак.

Ганна Сiльчанка, СШ № 1, Пахвальны водгук па матэматыцы

Ганна ў ліку лепшых вучаніц не толькі класа, а ўсёй школы. Вялікі акцэнт яна робіць на дакладных навуках, асабліва падабаецца матэматыка. Удзел у абласным этапе алімпіяды па матэматыцы прынёс дзяўчыне Пахвальны водгук.
– Добрая падрыхтоўка для мяне была вельмі важная, таму кожны дзень, нават падчас канікул, рашала лагічныя задачы, ураўненні, разнастайныя прыклады, якія могуць трапіцца сярод заданняў. Па праўдзе сказаць, на раённай алімпіядзе чамусьці хвалявалася больш. Утульная атмасфера інтэрната, у які нас засялілі і падтрымка з боку настаўнікаў, бацькоў і сяброў надавалі значную ўпэўненасць. Асабліва складанымі для мяне былі заданні па геаметрыі. Вельмі ўдзячна сваёй настаўніцы па матэматыцы Галіне Мікалаеўне Сегранёвай за добрую падрыхтоўку. Я бачыла, як яна хвалюецца за мяне ад першай да апошняй хвіліны, таму проста не магла падвесці яе, сваю школу, сваю першую настаўніцу Ірыну Уладзіміраўну Юр’еву, якая таксама аказвала мне вялікую падтрымку.