Дзеці – гэта асаблівая публіка. На ўсё, што адбываецца на сцэне, яны рэагуюць з уласцівай іх узросту эмацыйнасцю. Таму любое мерапрыемства для дзяцей патрабуе і асаблівай падрыхтоўкі. А калі справа тычыцца такой формы, як тэатральная пастаноўка, спектакль, то задача прыцягнуць увагу юных гледачоў, пагрузіць іх у атмасферу сюжэту, прымусіць суперажываць героям становіцца не проста складанай, а ператвараецца ў своеасаблівы іспыт на прафесіяналізм. Смею сцвярджаць, што не кожнаму даросламу тэатральнаму калектыву такое пад сілу. А вось дзіцячаму тэатральнаму калектыву «БРИЗ» Хоцімскай ДШМ гэта ўдалося. Сваёй новай пастаноўкай ён у чарговы раз даказаў, што нездарма носіць званне ўзорны.

Прэм’ера пастаноўкі паводле казачнага апавядання Генадзя Уласенкі «Малпачка» адбылася ў Хоцімскім раённым Цэнтры культуры пры вялікай колькасці гледачоў. Мастацкі кіраўнік і рэжысёр тэатральнага калектыву «БРИЗ» Ірына Васількова прызналася, што гэта была яе даўняя мара – увасобіць твор на сцэне на роднай беларускай мове. Спектакль, які раскрывае вечныя тэмы сяброўства і чалавечых узаемаадносін, фантазій і рэальнасці, цалкам ахапіў увагу публікі. У зале (а для дзіцячых спектакляў гэта важны паказчык) панавала зачараваная цішыня, якая перарывалася толькі дзіцячым смехам і апладысментамі ў адрас акцёраў, равеснікаў – гледачоў. Гэтую добрую казку падарылі ім Валерыя Лебедзева, Соф’я Бабакова, Арцём Ліпаў, Дар’я Прахарэнкава, Алёна Аліева, Анастасія Тамашова і Крысціна Кавалёва.
І выказваючы меркаванне гледачоў, хочацца яшчэ раз сказаць усім, хто падрыхтаваў гэты спектакль: дзякуй за задавальненне.

Алесь ЛЕСІН