Ураджэнка невялікай вёсачкі Князёўка нашага раёна Тамара Іванаўна Зайцава ганарыцца тым, што іхні 10 клас стаў першым выпускам Баханоўскай сярэдняй школы. Здольная вучаніца, паспяхова здаўшы ўступныя экзамены, стала студэнткай-завочніцай Маскоўскага тэхнікума сувязі. Пасля заканчэння вучэбнай установы ўладкавалася працаваць у Хоцімску ў «Саюздрук».

Ці магла яна меркаваць у далёкія 70-ыя годы, што будзе працаваць у меліярацыі бухгалтарам? Канешне ж не. Але так здарылася, што 1 лютага 1972 года была прынята ў Хоцімскі СМУч бухгалтарам.

– Работа бухгалтара звычайна зусім непрыкметная для калектыва, але без яе не будзе дзейнічаць ні адно падраздзяленне, – гаворыць жанчына, – спыніцца работа арганізацыі. А нашай арганізацыі кожны дзень эфектыўнай работы быў вельмі важны.

Тамара Іванаўна шмат добрых слоў гаварыла пра сваіх калег. Калектыў хоцімскіх меліяратараў праяўляў асаблівае старанне ў нялёгкай працы. Дасягалі добрых вынікаў. Гэта ўсё было дзякуючы вялікаму вопыту работы і жаданню працаваць, каб квітнела родная краіна.

Пералік службовых абавязкаў бухгалтара вялікі. І, канешне, Тамара Іванаўна выконвала іх усе адказна і граматна. Яна была заўсёды ў курсе навін, прынятых законаў і заканадаўчых актаў. Ведала, як іх прымяніць. І, безумоўна, бухгалтар – гэта апора, першы памочнік ва ўсіх фінансавых справах для кіраўніцтва. З ёй было лёгка і цікава працаваць: яна добразычлівы, спагадлівы чалавек.Бухгалтар Зайцава заўсёды знаходзіла агульную мову са спецыялістамі ўстаноў і арганізацый, з якімі прыходзілася супрацоўнічаць.

Ветлівая, тактычная, граматны спецыяліст. Так аб гэтай жанчыне адзываюцца цяпер былыя працаўнікі.

Яна працавала ў арганізацыі да выхаду на пенсію. На той час ужо займала пасаду эканаміста.

Наталля КАЦЯШОВА.
Фота аўтара