Набліжаецца адно з самых чароўных святаў – Новы год. Вакол усё ззяе рознакаляровымі агеньчыкамі, навагодні настрой адчуваецца ва ўсім. Асабліва чакаюць цудаў самыя маленькія хацімчане, якія не толькі прыдумалі, што заказаць на падарунак добраму Дзядулю Марозу, але і самі ператварыліся ў сапраўдных казачнікаў, і вырашылі сваімі маленькімі ручкамі стварыць цуд.

Варта толькі пераступіць парог дзіцячага садка № 3, адразу трапляеш у навагоднюю казку. Яе стварылі тут не толькі выхавацелі і працаўнікі ўстановы, але і самі малышы разам са сваімі бацькамі. Снегавікі, мішура, агеньчыкі, а яшчэ дзеці пастараліся і зрабілі навагоднія вырабы. Усе яны вельмі цікавыя і зроблены з самых разнастайных матэрыялаў: каляровая бумага, пластылін, шышкі, жалуды, пацеркі, мішура.
– Прапанавалі дзеткам прыдумаць нешта навагодняе сумесна з бацькамі. Атрымалася сапраўдная казка. Вельмі ўдзячны бацькам за такі актыўны ўдзел, і дзеткам вельмі спадабалася сумесная творчасць, – дзеліцца выхавацель Наталля Андрэева.
Яшчэ доўга рабяты расказвалі аб сваіх навагодніх шэдэўрах і аб тым, што вельмі чакаюць Новага года. Немагчыма было адвесці погляду ні ад вырабаў, якія яны стварылі, ні ад дзіцячых вачэй, поўных шчасця і радасці. Ну, сапраўдныя маленькія казачнікі – што тут яшчэ скажаш!

Вольга Зайцава