У бягучы аўторак дзверы цэнтральнай раённай бібліятэкі расчыніліся не толькі для чытачоў, але і для ўсіх жадаючых. Скажу вам, што не так часта ў Хоцімску бываюць сталічныя госці, прытым, тэлевізійныя. У гэты дзень адбылася прэзентацыя кнігі «Смак беларускай кухні», ініцыятарам і аўтарам якой з’яўляецца вядомы беларускі шэф-повар, эксперт беларускай і славянскай кухні, гісторык кулінарыі Алена Мікульчык. Прысутныя даведаліся, што дадзеная кніга выйшла ў свет у 2019 годзе на трох мовах: беларускай, рускай і англійскай. У выданне ўвайшло 37 рэцэптаў страў і 9 напояў, у тым ліку і традыцыйных напояў, такіх як мажжавелаўка, крамбамбуля, вішняк і іншыя. Стравы размеркаваны па сезонах, абапіраючыся на тое, што елі і пілі беларусы розных саслоўяў зімой, вясной, летам і восенню.
Усе жадаючыя маглі бліжэй пазнаёміцца з самім аўтарам, набыць кнігу па зніжанай цане і атрымаць аўтограф Алены, а таксама паўдзельнічаць у віктарыне на веданне беларускай кухні з прызамі.
Гэты вечар прайшоў весела, пазнавальна і цікава. У канцы мерапрыемства ўсіх прысутных у зале чакаў майстар-клас, у якім яны самі прынялі ўдзел, па падрыхтоўцы шляхецкіх цукерак без цукру па рэцэпце 19 стагоддзя.
Таксама ў гасцей са сталіцы была магчымасць наведаць захавальнікаў мясцовых страў – Ганну Салаўеву, Надзею Мехедзька, Ніну Гаўрычэнка, Ніну Дземянкову.

Іна ДЗМІТРАЧКОВА.
Фота аўтара