Александр Каржов вошел в число финалистов фотоконкурса Федерации профсоюзов Беларуси
Народны фотаконкурс Федэрацыі прафсаюзаў Беларусі «Радзіма» існуе ўжо другі год, і год ад году ён набывае ўсё больш прыхільнікаў. А нядаўна выйшаў каталог лепшых работ фіналістаў. Ен падзелены на катэгорыі, сярод якіх болей усяго работ, прысвечаны тэме малой радзімы. Дарэчы, у катэгорыі «З вялікай любоўю да малой радзімы» ёсць праца і нашага земляка, педагога ЦТДзіМ, прафсаюзнага актывіста Аляксандра Каржова, якая называецца «Ранняя вясна. Іваноўскі гай».
– Атрымаўшы пастанову аб правядзенні конкурса, прапанавалі прыняць удзел педагогу ЦТДзіМ Аляксандру Каржову. Ён без роздуму пагадзіўся, так як тэма малой радзімы вельмі блізкая для яго, у архіве педагога нямала фотаздымкаў. Яшчэ тры гады таму Аляксандр Аляксандравіч займаў прызавыя месцы з дадзенай работай. І вось у чарговы раз фотапраца ў ліку лепшых. Сёння яна ўпрыгожвае адзін з кабінетаў ЦТДзіМ, – расказвае Таццяна Ткачова, старшыня райкама прафсаюза працаўнікоў адукацыі і навукі.
Як расказаў сам майстар, праца была выканана падчас чарговай фотасесіі на пленэры ранняй вясной у адным з найпрыгажэйшых месцаў Хоцімшчыны – Іваноўскім гаі.
– Сёння ў мяне вялікая колькасць фотаздымкаў, на якіх самыя прыгожыя мясціны маёй малой радзімы. Асабіста для мяне тут кожны куточак прыгожы і дарагі сэрцу. Пры фатаграфаванні важна інтуітыўна адчуць самы важны момант. А мне здаецца, калі любіш нешта шчыра, усёй душой – гэта і адлюструецца на фота, – разважае педагог.
Уважліва ўгледзеўшыся ў пейзаж і сапраўды можна «разглядзець» пачуцці Аляксандра да любімай Хоцімшчыны. Яны падобныя першаму веснавому сонейку, мяккім аблокам і лёгкаму ветрыку. Менавіта гэта ўнікальны педагог захаваў у сваёй працы.
Вольга Зайцава.
ФОТА аўтара